Perezida Idriss Déby Itno warumaze imyaka 30 ku butegetsi yapfuye arashwe

Perezida Idriss Déby Itno warufite imyaka 68, kuri uyu wa kabiri taliki ya 20 Mata 2021 nibwo Igisirikare cya Chad cyatangaje ko yishwe n'ibikomere nyuma yo kuraswa n'inyeshyamba. Ifoto: BBC

Perezida w’Igihugu cya Chad Idriss Déby, wavutse taliki 18 Kamena 1952 i Berdoba muri Chad yagiye ku butegetsi kuva mu 1990, yapfuye azize ibikomere nyuma yo kurasirwa ku rugamba mu minsi ishize, nkuko byatangajwe n’igisirikare cya Chad.

Nkuko BBC ibivuga, ngo ibi byatangajwe nyuma yuko ibyavuye mu matora by’agateganyo bigaragaza ko yatsindiye manda ya gatandatu yiyamamarije. Aya matora akaba yabaye mu bihe ubutegetsi bwe bwari busumbirijwe n’inyeshyamba. Ingabo za Chad zikaba zikomeje kurwana n’inyeshyamba zagabye ibitero ku murwa mukuru N’Djamena.

Igisirikare cyahise gitangaza iseswa rya guverinoma n’inteko ishingamategeko, n’Ishyirwaho rya Leta y’inzibacyuho. Iyo nzibacyuho y’amezi 18 izayoborwa n’akanama ka gisirikare gakuriwe na Mahamat Idriss Déby, umuhungu wa Idriss Déby Itno, usanzwe ari jenerali mu ngabo za Chad.

Gusa umwalimu muri kaminuza akaba n’umusesenguzi wa politike Dr Evariste Ngarlem Toldé yabwiye BBC ko ibyo igisirikare cyakoze binyuranyije n’itegekoshinga rya Chad; kuko rivuga ko iyo perezida adahari, umukuru w’inteko ishingamategeko ari we ujya ku butegetsi, agategura amatora we atagomba kubamo umukandida.

 

 

Sangiza abandi iyi nkuru

Leave a Reply

Your email address will not be published.

Solve : *
22 − 20 =