Umuyobozi w’akarere ka Nyabihu yasabye abafatanyabikorwa guhuza ingufu bagamije kunoza serivisi ku baturage

Mu rwego rwo kurushaho kwegera abaturage hagamijwe kubasobanurira ibibakorerwa no kubasobanurira serivisi zibagenewe, abafatanyabikorwa mu karere ka Nyabihu bateguye imurikabikorwa (open day).

Ubuyobozi bw’Akarere bwashimiye abafatanyabikorwa bitabiriye iki gikorwa cyabereye muri gare ya Mukamira kuva ku itariki 10 kugeza ku ya 12 Kamena 2026.

Umuyobozi w’akarere ka Nyabihu MUKANDAYISENGA Antoinette yashimiye abafatanyabikorwa bitabiriye iri murikabikorwa abasaba gushyira imbaraga mu gutanga serivisi nziza, hashyirwa umuturage ku isonga no kurangwa n’ubufatanye mu kuzamura iterambere ry’Akarere.

Ikigega Cyihariye cy’Ingoboka (SGF) ni kimwe mu bigo bya leta byitabiriye iri murikabikorwa. Ubuyobozi bwa SGF bwasobanuye ko bwitabiriye iri murikabikorwa hagamijwe gusobanura serivise zitangwa nayo.

Abaturage basuye aho bamurikiraga ibikorwa bishimira ubufasha buhabwa abangirizwa n’inyamaswa muri aka karere, ndetse n’abahura n’ibibazo by’impanuka zitezwa n’ibinyabiziga bitamenyekanye, n’ibitagira ubwishingizi.

SACCO Karisimbi yo mu karere ka Nyabihu, nayo yitabiriye iri murikabikorwa.
Umuyobozi w’ishami ry’ibikorwa muri iyi SACCO, Niyomukesha Rachel yasobanuriye The Bridge Magazine ko kwitabira iri murikabikorwa byabafashije kwegera abakiriya babo ndetse bakanabasha kuhungukira abakiliya bashya. Iri murikabikorwa ryaborohereje kwegera abakiriya babo, bakabasobanurira imikorere ya SACCO Karisimbi Nyabihu (KSN) n’inyungu zo gukorana nayo n’ amakuru ajyanye n’inguzanyo batanga.

Imurikabikorwa ryitabiriwe n’imiryango mpuzamahanga, imiryango nyarwanda itegamiye kuri leta, ibigo bya leta, amakoperative abanyabukorikori, n’abandi.