Gashaki – Musanze: Urubyiruko rurasaba ishuri ry’Ubumenyingiro  

Umuyobozi w’akarere ka Musanze, Nuwumuremyi Jeanine, ubwo yasubizaga bimwe mu byifuzo abaturage basabye ko bakorerwa mu mihigo ya 2020/2021.

Urubyiruko rwa Gashaki akarere ka Musanze rurasaba ko muri uyu murenge hashyirwaho ishuri ry’ubumenyingiro (TVET School) kuko ababyeyi bamwe badafite ubushobozi bwo kujyana abana kubyigira kure aho bibasaba  kwiga baba ku ishuri. Ibi bigatuma urubyiruko rwiriwa ruzerera.

Noheli Nkurikiyumukiza ni umwe mu rubyiruko akaba anaruhagarariye muri uyu murenge, atuye mu kagali ka Mbye yagize ati “ iyo urebye hano mu murenge wa Gashaki nta TVET school nimwe dufite kandi mu by’ukuri, umwana aba afite ishyaka ryo kwiga ariko yabwira umubyeyi ati ndashaka kujya kwiga ubwubatsi, ndashaka kujya kwiga ubudozi, ugasanga  azajya kubyiga hariya i Musanze, ariko ubushobozi bw’umubyeyi bugoye cyane, icyadufasha hakajyaho TVET School byaba byiza cyane”.   Yanavuze ko kutagira aya mashuri y’imyuga bikurura ubuzererezi no gutwara inda zitateganijwe kuko abarangije uburezi bw’ibanze bw’imyaka 9 na 12 babura icyo bakora bitewe no kutamena umwuga.

Habamenshi Cyprien ni Pasiteri mu Itotero ry’Abangirikani mu Rwanda, Paroisse ya Ntarama mu murenge wa Gashaki, akaba na Perezida w’Ihuriro ry’Amadini muri uyu murenge yavuze ko  hari amashuri yubatswe na Paroisse ariko ntiyigirwemo agera kuri 6, kuri ubu akaba yatanga igisubizo. Yagize ati “ubu twatangiye kuzivugurura, tugiye gufata icyemezo cyo gutangiza TVET duhere ku byoroshye; ubudozi, ububaji twatangira gukoresha ayo mazu kugira ngo dushyigikire bariya bana”.

Abaturage ba Gashaki barimo gutanga ibitekerezo kubyazakorwa mu mihigo y’umwaka wa 2020/2021.

Si TVET School gusa uru rubyiruko rukeneye ahubwo bakeneye na ICT Room. Umuyobozi w’akarere ka Musanze, Nuwumuremyi Jeanine, yavuze ko ibyo uru rubyiruko byasabye ari  byiza cyane.

“Niba urubyiruko rwitekerereza icyo rukeneye ni icyizere ko urubyiruko rufitiye ubuyobozi bwiza, ICT Room, ahantu bashobora gukoresha ikoranabuhanga, kubona urubyiruko rureba imbere mu cyerekezo cy’Igihugu birashimishije, nk’ubuyobozi twabyumvise ningombwa ko bijya mu bikorwa”.

Muri iki gihe u Rwanda n’Isi  mu rusange byugarijwe n’icyorezo cya corona virus, aho bibujijwe ko abantu bahura hamwe mu rwego rwo kwirinda kwanduzanya; ubu harimo kwifashishwa ikoranabuhanga  mu kazi gatandukanye harimo inama n’amahugurwa yaba abari imbere mu gihugu n’abari hanze. Ibi bikaba byaratumye ibyinshi  byarakomeje gukorwa hakoreshejwe ikoranabuhanga harimo zoom, webex n’izindi. Aho abantu barebana imbonankubona, bakavugana ndetse bagatanga ibitekerezo  batavuye aho bari .

Sangiza abandi iyi nkuru

Leave a Reply

Your email address will not be published.

Solve : *
3 + 16 =