Abakozi ba SGF basuye urwibutso rwaJenoside rw’akarere ka Gakenke banorozainka abarokotse jenoside muri aka karere

Kuri uyu wa 15 Gicurasi 2026, abakozi b’Ikigega cyihariye cy’Ingoboka (SGF) basuye urwibutso rwa Jenoside yakorewe Abatutsi rw’akarere ka Gakenke banoroza inka imiryango 7 y’abarokotse Jenosideyakorewe Abatutsi.

Ni igikorwa ngarukamwaka SGF isanzwe itegura mu rwego rwo kwibuka Jenoside yakorewe Abatutsi no gushyigikira abayirokotse.

Madamu Nibakure Florence, umuyobozi mukuru w’agateganyo wa SGF yasobanuye ko ibikorwa byo kwibuka Jenoside yakorewe Abatutsi muri SGF bihabwa agaciro, akaba ari muri urwo rwego buri mwaka SGF ikorana na Ibuka hagatoranywa urwibutso rwa Jenoside rusurwa, ndetse n’abarokotse Jenoside bo muri ako gace bakagira icyo bagenerwa mu rwego rwo kubagaragariza urukundo no kubafata mu mugongo.

Umunyamabanga nshingwabikorwa wa IBUKA bwana Naphtal Ahishakiye ndetse n’abahawe inka bahurije mu gushimira SGF ku bikorwa byiza byo kubashyigikira, kuko ari ikimenyetso cy’urukundo kandi bizafasha mu kwikura mu bukene.

Umuyobozi w’akarere ka Gakenke wungirije ushinzwe iterambere ry’ubukungu Niyonsenga Aimé yashimiye SGF n’ubuyobozi bukuru bwa IBUKA kuba barahurije mu guhitamo gushyigikira abaturage ba Gakenke.

Yasobanuye amateka yaranze Gakenke kuva mu gihe cy’ubwami kugeza mu gihe cya Jenoside yakorewe Abatutsi, n’uburyo bamwe mu bayobozi bagiye babiba urwango rwagejeje kuri Jenoside.

Yasobanuye ko kubera ubuyobozi bugamije kubanisha neza Abanyarwanda, ubu abaturage babanye neza kandi bafatanya n’ubuyobozi kurwanya icyagarura ingengabitekerezo ya Jenoside.

Angelique Mukamurenzi