Rwamagana: Urubyiruko rw’abakorerabushake rugiye kubaka inzu zirindwi z’abatishoboye
Urubyiruko rw’abakorerabushake rwo mu Karere ka Rwamagana rwatangije ibikorwa bizamara ukwezi, birimo kubaka inzu z’abatishoboye, gusana amazu, kubaka ubwiherero n’uturima tw’igikoni, ndetse no gukora imihanda y’abaturage.
Ibi bikorwa byatangijwe mu Murenge wa Kigabiro, mu rwego rwo gutangiza ukwezi kwahariwe kuzirikana Ubumwe n’Ubudaheranwa bw’Abanyarwanda, ku nsanganyamatsiko igira iti: “Twigire ku mateka, twimakaze ubumwe bwacu.”
Mu gikorwa cy’umuganda cyabereye mu Kagari ka Nyagasenyi, urubyiruko rw’abakorerabushake rwasibuye umuhanda w’abanyamaguru wari warangiritse, rufatanyije n’abaturage ndetse n’inzego z’ibanze.
Urubyiruko rwiyemeje gukomeza ibikorwa by’ubukorerabushake
Dushime Bely Belyse, uhagarariye urubyiruko rw’abakorerabushake mu Murenge wa Kigabiro, yavuze ko ibikorwa by’ubukorerabushake bizajya bikorwa buri wa Gatatu na buri wa Gatandatu, bikagera ku bigo by’amashuri no ku baturage.
Yagize ati: “Buri wa Gatatu na buri wa Gatandatu tuzakora ibikorwa by’ubukorerabushake mu bigo by’amashuri ndetse no mu baturage, birimo gusana amazu n’ibindi.”
Belyse yavuze kandi ko ibikorwa bizasozwa n’umukino wa gicuti uzahuza urubyiruko rw’abakorerabushake, DASSO na Polisi.
Inzu zirindwi zizubakwa
Eugene Ntaganira, Umuhuzabikorwa w’urubyiruko rw’abakorerabushake mu Karere ka Rwamagana, yavuze ko ibikorwa byatangirijwe mu Murenge wa Kigabiro, bikazakomereza mu yindi mirenge, bigasorezwa mu Murenge wa Muyumbu.
Ati: “Dufatanyije n’abaturage ndetse n’inzego za Leta, twatangiriye mu Murenge wa Kigabiro dukora umuhanda ducukura rigori. Ibikorwa tuzabisoreza mu Murenge wa Muyumbu, aho tuzubakira umuturage utishoboye.”
Ntaganira yavuze ko muri uku kwezi hateganyijwe ibikorwa bitandukanye bigamije gufasha imiryango itishoboye.
Ati: “Tuzubaka inzu z’abaturage, harimo n’izo tuzahera hasi zigera kuri zirindwi. Hari n’izindi tuzasana, tuzubaka ubwiherero butanu, ndetse tunashyireho uturima tw’igikoni 164 mu rwego rwo kurwanya igwingira.”
Yasabye urubyiruko n’abaturage muri rusange kwitabira ibikorwa biteganyijwe muri uku kwezi, avuga ko ari umwanya wo kugira uruhare mu bikorwa byubaka igihugu.
“Tugomba gusigasira ibyagezweho”.
Mbonyumuvunyi Radjab, Umuyobozi w’Akarere ka Rwamagana, yavuze ko uku kwezi ko kuzirikana Ubumwe n’Ubudaheranwa bw’Abanyarwanda ari gahunda ngarukamwaka igamije gufasha Abanyarwanda gusubiza amaso inyuma bakiga ku mateka yabo.
Yavuze ko hateganyijwe ibiganiro bizagera ku byiciro bitandukanye by’abaturage, birimo abanyeshuri, urubyiruko rukora imirimo itandukanye, abamotari, abanyonzi ndetse n’abakora mu bwubatsi.
Ati: “Hateganyijwe ibiganiro mu mashuri, mu rubyiruko ruri mu mirimo itandukanye, haba mu bamotari, abanyonzi, abakorera ku nyubako. Tuzagerageza kugera mu byiciro byose kugira ngo baganirizwe ku mateka yacu nk’Abanyarwanda.”
Uyu muyobozi yavuze ko muri ibyo biganiro abaturage bazibutswa amateka mabi u Rwanda rwanyuzemo, ariko bakigishwa no ku mateka meza ndetse n’intambwe igihugu kimaze gutera.
Ati: “Tukabereka amateka mabi twanyuzemo biciye mu bukoroni, tukanabereka noneho n’amateka meza n’intambwe imaze guterwa, tukabasaba gusigasira ibyagezweho.”
Yongeyeho ko inshingano zo gusigasira ibyagezweho zitareba urubyiruko gusa, ahubwo ko n’abakuze bakwiye kugira uruhare mu kuganiriza no kuyobora urubyiruko.
Yasabye abaturage gufatana urunana, bagakorera hamwe mu kubaka igihugu no kurinda ibyagezweho.
Ati: “Ni ibikorwa bigomba kugirwamo uruhare na buri wese. Ntibibe iby’abayobozi gusa, ahubwo bibe iby’abayobozi n’abaturage bafatanyije.”
Ibi bikorwa by’urubyiruko rw’abakorerabushake bizamara ukwezi, kuva ku itariki ya 1 kugeza ku ya 31 Ukwakira 2026, bikazasorezwa mu Murenge wa Muyumbu.
Nyirahabimana Josephine
About Author
