Kwihangira udushya binyuze mu mishinga bizabageza kuri ba Rwiyemezamirimo b’icyitegererezo

Karangwa Steven ufite umushinga wo gukora drone zizifashishwa mu gutera imiti mu myaka

Muri gahunda yo gukangurira urubyiruko rurangije za Kaminuza kwihangira imirimo, abanyeshuri biga mu bijyanye n’ubuhinzi n’ubworozi UR CAVM i Musanze bakoze imishinga. Mu mishinga 50 yakozwe hatoranijwemo imishinga 15 nayo izatoranywamo imishinga 10 izafashwa mu bijyanye n’amahugurwa, ibitekerezo ndetse n’ubushobozi.  

Uwanyirigira Jeannette yarangije umwaka ushize wa 2018 muri Food science (ubumenyi mu bijyanye n’ibiribwa) mu Ishuri ry’Ubuhinzi n’Ubworozi UR CAVM, umushinga we uri muri 15 yatoranijwe ukaba uwo gutunganya ibikomoka  ku mboga, inyama na soya ; uru rusobe rukabyazwamo amafunguro yuzuye intungamubiri ari mu bwoko bwa burete na tofu. Avuga ko umushinga we utsinze yageza ibi biribwa bye ku isoko agahaza abaturage ndetse ugafasha mu gukemura ikibazo cy’imirire mibi cyugarije abana.

Abanyeshuri batanze imishinga bari kumwe n’abazabakurikirana mu mishinga 10 izatoranwa

Karangwa Steven yiga mu mwaka 3 mu Ishami ry’Ubuhinzi muri UR CAVM afite umushinga wo gukoresha drone mu gutera imiti irwanya ibyonnyi mu myaka aragira ati « muri gahunda yo guhuza ubutaka ibyonnyi bikibasira imyaka, bihombwa umuhinzi n’igihugu muri rusange, akaba ariyo mpamvu nateguye uyu mushinga wo gukoresha drone mu kurwanya udukoko twibasira imyaka, kurinda abantu indwara bandura biturutse kugutera imiti cyangwa se indwara abantu bashobora kujyana mu myaka nka cyumya, ndetse n’amafaranga yahabwaga abatera imiti n’umwanya byatwaraga batera imiti. » Ibi  ngo bizazamura umusaruro ndetse nabo biteze imbere aho guhanga amaso leta ngo ibahe akazi.

Landuard Semukera Umujyanama mu by’Ubuhinzi mu mushinga USAID Hinga Weze

Landuard Semukera Umujyanama mu by’Ubuhinzi mu mushinga USAID Hinga Weze watangijwe ku bufatanye n’Ikigo cy’Igihugu Gishizwe Guteza Imbere Ubuhinzi n’Ubworozi RAB ku nkunga y’Umuryango w’Abanyamerika Wita ku Iterambere Mpuzamahanga USAID  intego yabo akaba ari ugufasha abahinzi basanga 530,000 mu turere 10 ikoreramo mu kwita ku buhinzi  no kunoza imirire, avuga ko imishinga 10 izatsinda, bazayifasha kubona amahugurwa n’inkunga bitewe nibyo imishinga izatoranwa izaba ikeneye.

Kaminuza y’u Rwanda Ishami ry’Ubuhinzi n’Ubworozi UR CAVM, Ihuriro ry’urubyiruko rukora  imirimo y’ubuhinzi n’ubworozi RYAF na Envisage  ku bufatanye n’umushinga wa USAID Hinga weze, batangije santire izafasha aba banyeshuri bafite imishinga gukora ubushakashatsi, amahugurwa ndetse nushaka kubafasha amenye aho yabasanga.

 

 

 

 

Sangiza abandi iyi nkuru

Leave a Reply

Your email address will not be published. Required fields are marked *

Solve : *
23 + 13 =