ASA International (Rwanda) Plc yatangije icyumweru cyahariwe serivisi zihabwa abakiriya
Iki cyumweru cyahariwe serivisi zihabwa abakiriya, cyitezweho kongera kubashyira ku isonga no gukomeza kubaka icyizere hagati y’ikigo n’abakigana.
N’icyumweru cyatangiye ku wa 5 Ukwakira kikazarangira ku wa 9 Ukwakira 2026. Cyatangirijwe ku ishami rya ASA International (Rwanda) Plc riri i Kimironko, mu muhango wayobowe n’Umuyobozi Mukuru w’iki kigo, Salifou Christian, ari kumwe n’abagize itsinda ry’ubuyobozi n’abakozi.
Ni icyumweru cyahariwe gushyira abakiriya ku isonga mu bikorwa by’ikigo, kubatega amatwi no gukomeza kubaka icyizere hagati yabo na ASA International (Rwanda) Plc.
Muri uyu muhango, Umuyobozi Mukuru n’abagize ubuyobozi begereye abakiriya, barabakira banabaha serivisi, mu rwego rwo kugaragaza ko ASA International (Rwanda) Plc ishyira abakiriya ku isonga kandi igaharanira kubaha serivisi z’imari zihuse kandi zijyanye n’ibyo bakeneye.
Salifou Christian, Umuyobozi Mukuru wa ASA International (Rwanda) Plc, yavuze ko abakiriya ari bo shingiro ry’ibikorwa byose by’ikigo.
“Abakiriya bacu ni bo shingiro ry’ibyo dukora byose. Gutanga serivisi nziza ni ukubaka icyizere abakiriya batugirira buri munsi no gukomeza kunoza imikorere yacu.”
Yongeyeho ko kwita kuri serivisi zihabwa abakiriya bifitanye isano ya hafi n’inshingano rusange z’ikigo zo guteza imbere serivisi z’imari zigerwaho na benshi no gufasha abantu kuzamura imibereho yabo.
Ati: “Iyo dutanze serivisi z’imari, ntituba dufashije abakiriya ku giti cyabo gusa; tuba tunafashije ba rwiyemezamirimo n’imiryango, ndetse tukagira uruhare mu iterambere ry’abaturage.”
Abakiriya ku isonga
Kuri ASA International (Rwanda) Plc, Icyumweru cyahariwe Serivisi zihabwa Abakiriya ni n’umwanya wo kumva ibitekerezo by’abakiriya, gusobanukirwa ubunararibonye bwabo no kumenya uruhare bagira mu kunoza serivisi bahabwa.
Umwe mu bakiriya witabiriye umuhango wo gutangiza iki cyumweru ku ishami rya Kimironko, yashimye iki gikorwa, avuga ko ari ingenzi ko abakiriya bahabwa agaciro, bakubahwa kandi bagahabwa serivisi zijyanye n’ibyo bakeneye.
Marie Claire Muhawenimana, umukiriya wa ASA International (Rwanda) Plc, yagize ati:
“Twishimiye ko twahawe agaciro. Serivisi nziza iduha icyizere kandi ikatwereka ko umubano dufitanye na ASA International (Rwanda) Plc utagarukira gusa kuri serivisi z’imari, ahubwo ko ibitekerezo n’ubunararibonye bwacu nk’abakiriya bifite agaciro.”
Ibikorwa byo kwizihiza iki cyumweru biri gukorerwa ku mashami atandukanye ya ASA International (Rwanda) Plc ndetse no ku cyicaro gikuru.
Abakozi barashishikarizwa kurushaho kwegera abakiriya no gukorera ku ndangagaciro zirimo ubunyamwuga, kwihutira gukemura ibibazo, kubaha abakiriya no gutanga serivisi zinoze.
Nubwo iki cyumweru gitanga umwanya wihariye wo kwizihiza no gushimira abakiriya, ASA International (Rwanda) Plc ishimangira ko gushyira abakiriya ku isonga ari inshingano ikorwa buri munsi.
Serivisi z’imari zitandukanye
Muri serivisi zitangwa na ASA International (Rwanda) Plc harimo konti zisanzwe, konti zo kwizigamira, inguzanyo nto, inguzanyo zigenewe imishinga mito ndetse n’inguzanyo zo kugura amapikipiki akoresha amashanyarazi.
Abakiriya kandi bashobora kugera kuri serivisi hifashishijwe ikoranabuhanga rya USSD (*576#), ndetse bakabona ubufasha banyuze ku murongo utishyuzwa wa 5002.
Serivisi zo kubitsa amafaranga zatangijwe ku mashami ya Kimironko na Kicukiro, biteganyijwe ko zizagurwa zikagera no ku yandi mashami yo mu gihugu. Ibi bizafasha abakiriya benshi kurushaho kubona uburyo bwizewe bwo kwizigamira.
ASA International (Rwanda) Plc ni ikigo cy’imari iciriritse cyemerewe kwakira amafaranga abitswa, kandi gifite uruhushya rwa Banki Nkuru y’u Rwanda (BNR). Cyashinzwe mu 2014, gitangira ibikorwa mu 2016.
Iki kigo gitanga serivisi z’imari zigamije kugera ku bantu benshi kandi zishingiye ku byo abakiriya bakeneye, by’umwihariko abantu ku giti cyabo n’abafite imishinga mito.
Mu bakiriya bacyo, abagore bangana na 70%, mu gihe kandi cyibanda ku baturage bafite amikoro make n’abataragerwaho bihagije na serivisi z’imari.
Kugeza ubu, ASA International (Rwanda) Plc ikorera mu Rwanda ifite amashami 37, aho ikorera abakiriya bagera ku 22,000.
ASA International (Rwanda) Plc ni ishami rya ASA International, imwe mu bigo mpuzamahanga bikomeye mu rwego rw’imari iciriritse. ASA International iri ku Isoko ry’Imigabane ry’i Londres kandi ikorera mu bihugu 13 byo muri Afurika no muri Aziya.
Kugeza ku wa 30 Kamena 2026, ASA International Group yari ifite amashami arenga 2,100 n’abakiriya bagera kuri miliyoni 2.7 ku isi hose.
Intego y’iki kigo igaragarira mu ntero igira iti: “Creating Hope. Changing Fortunes”, bisobanuye “Kubaka Icyizere, Guhindura Imibereho.”
About Author
