Ikizamini cya ECL kigiye gukorwa bwa mbere mu Rwanda: Germany Academy isobanura amahirwe kigiye guha abize Ikidage

Ubuyobozi bwa Germany Academy , butangaza ko bugiye gufasha abize ururimi rw’ikidage gutsinda ikizamini cya ECL ( European Consortium for the Certificate of Attainment in Modern Languages) ,kigiye gukorwa ku ncuro ya mbere mu Rwanda.

Ni ikizamini cyemewe ku rwego mpuzamahanga gikoreshwa mu gusaba Viza muri bimwe mu bihugu by’Ubumwe bw’ Uburayi bisaba kuba umuntu azi ururimi rw’ikidage,gusaba akazi n’izindi serivisi no ku bashaka kwiga muri za Kaminuza.

Ibi ubuyobozi bwa Germany Academy bwabitangarije mu kiganiro n’itangazamakuru cyo kuri uyu wa 21 Ukuboza 2025.Ni ikiganiro cyibanze ku mahirwe abazakora ikizamini cya ECL bafite haba mu kubona imirimo muri bimwe mu bihugu bigize ubumwe bw’u Burayi bisaba ubumenyi bw’ururimi rw’ikidage n’izindi serivisi nkenerwa harimo no kwiga mu muri za Kaminuza zo mu Budage.

Ikizamini cya ECL kizajya gikorwa incuro esheshatu mu mwaka. Ikizamini cya mbere kizatangira kuva taliki ya 6 kugeza taliki ya 7 Gashyantare 2026.Kwiyandikisha byatangiye taliki 8 Ukuboza 2025 bizarangira taliki 6 Mutarama 2026.

Umuyobozi wa Germany Academy cyangwa se Der Sprachen Hub, Mwizerwa M. yasobanuye uko bagiye gufasha abize ururimi rw’Ikidage gukora no gutsinda ikizamini cya ECL mu buryo buboroheye n’icyo impamyabumenyi bazahabwa izabafasha.

Yagize ati: ‘Ikizamini cyacu kirakoreka kandi kiratsindika kubera uburyo cyumvikana. Uburyo tubaramo amanota birasobanutse.Ibiciro by’abanyeshuri bize iwacu muri Germany Academy twarabimanuye cyane mu kuborohereza.Ikizamini cya ECL kiremewe ku rwego mpuzamahanga ku bantu bari gusaba Viza mu bihugu by’ I Burayi bisaba kuba abantu bazi ururimi rw’Ikidage mu gusaba Viza, ubwenegihugu , akazi, no ku bagiye kwiga Kaminuza.”

Amahirwe y’ akazi ku bafite impamyabumenyi ya ECL

Mwizerwa yavuze ko abize Ikidage muri Germany Academy bakahakorera ikizamini cya ECL bahabwa impamyabumenyi ibahesha imirimo itandukanye mu mahanga .

Ati:’’ Abashaka kuzamura no guhaha ubumenyi bafite impamyabumenyi ya ECL bashobora kujya mu Budage bagakorera amafaranga kandi bakaza gufasha igihugu cyacu mu gutera imbere.Abize ubuganga, uburezi, ubuhinzi n’ abize mu mashuri y’imyuga na tekiniki babona imirimo.Hari kandi abize ibijyanye no kwita ku mashyamba , gukora mu nganda zitunganya ibiribwa,amata n’ibiyakomokaho . Iyi myuga yose ikeneye abigishwa kugirangoo bayikoremo bakaba banagaruka mu Rwanda bazanye ubwo bumenyi bagafatanya n’abandi mu iterambere.”

Germany Languages Academy /Der Sprachen Hub itanga amasomo y’Ikidage kuva ku rwego rwa A1 kugeza kuri C1.Abiga bashyiriweho uburyo butandukanye bwo kwiga burimo imbona nkubone aho bakorera mu mujyi wa Kigali, mu karere ka Nyarugenge, uburyo bw’iyakure( e-learning) .Hari gahunda y’abiga ku manywa, nyuma y’akazi no muri week-end.

NYIRANGARUYE Clementine